Shqipëria U21 është mundur 0-2 nga nënkampionia e Europës, Gjermania U21, në miqësoren e zhvilluar në “Elbasan Arena”. Kuqezinjtë bënë një pjesë të parë të mirë, duke rezistuar ndaj talentëve gjermanë, por në pjesën e dytë miqtë shënuan dy herë brenda pak minutash, duke vulosur fitoren.
Në radhët e Gjermanisë spikatën emra të njohur si Brajan Gruda dhe Nelson Wiper, të cilët u aktivizuan titullarë, ndërsa në stolin teknik ishte si zëvendëstrajner ish-mbrojtësi shqiptar, Shkodran Mustafi, duke i dhënë sfidës një ngjyrim të veçantë për publikun vendas.
Trajneri gjerman befasoi në nisje të pjesës së dytë, duke kryer plot 10 zëvendësime njëherësh, çka solli freski dhe energji të reja në lojën e skuadrës së tij.
Për kuqezinjtë, ky ishte një test i rëndësishëm përballë një prej përfaqësueseve më të forta në kontinent, ndërsa miqësorja e radhës do të luhet të hënën në Zvicër kundër helvetëve U21.