Në një klimë politike shpesh të mbytur nga klishetë dhe retorika boshe, dalja në skenë e figurave të reja si deputetja socialiste e Elbasanit, Sara Mila, përfaqëson më shumë sesa thjesht një brez të ri politikanësh ,përfaqëson një qasje të re, më të ndershme, më të drejtpërdrejtë dhe të guximshme për të kërkuar ndryshimin.
Edhe pse mjaft e re , Mila është shndërruar në një nga zërat më të sinqertë dhe kritikë brenda Partisë Socialiste, duke mos u mjaftuar me retorikë të butë, por duke ngritur zërin aty ku për shumë kohë ka mbizotëruar heshtja ,për Elbasanin, për zhvillimin, për të ardhmen.
Në një intervistë të fundit për “Radio Tirana”, Mila nuk kurseu fjalët për të përshkruar një realitet të hidhur,mungesën e angazhimit nga përfaqësuesit e mëparshëm të qarkut të Elbasanit, që sipas saj, kanë qëndruar të përgjumur përballë sfidave të qytetit. “Investimet në qarqe duan një lobim pozitiv në qeveri. Por prej shumë vitesh, përfaqësuesit e Elbasanit në Parlament nuk kanë bërë sa duhet për të sjellë projekte e investime që rikthejnë shpresën tek të rinjtë,” u shpreh ajo, me një ton që nuk linte vend për justifikime.
Fjalët e saj nuk janë thjesht kritikë. Janë një thirrje për një garë të ndershme për fonde, për projekte të prekshme dhe për një përfshirje më të gjerë të potencialit njerëzor që Elbasani ka me bollëk. “Ky qytet ka potencial, ka njerëz të aftë dhe energjikë, por duhet më shumë përkushtim dhe vizion,” theksoi Mila, duke vënë theksin aty ku shpesh është anashkaluar:,te nevoja për përfaqësim dinjitoz dhe strategji të qarta zhvillimi.
Edhe pse zgjodhi të mos përmendë emra, mesazhi i saj është i qartë: ka ardhur koha që brezi i ri të marrë në dorë fatet e qytetit dhe të lërë pas politikat e vjetra, emrat e konsumuar dhe gjuhën e zbrazët. Sara Mile po bëhet kështu zëri i një gjenerate që kërkon të flasë troç, të punojë fort dhe të mos heshtë përballë padrejtësive, qoftë edhe brenda vetë radhëve të mazhorancës që përfaqëson.
Ajo po fiton gjithnjë e më shumë respekt, jo vetëm si një fytyrë e re në politikë, por si një përfaqësuese që di të mbajë përgjegjësi, të kritikojë aty ku duhet dhe të udhëheqë me integritet. Në një kohë kur qytetarët janë të lodhur nga premtimet, Sara Mila ofron një model të ri,atë të përfaqësueses që nuk flet për të qenë e pëlqyer, por për të bërë diferencën.
Elbasani ka nevojë për zëra si i saj. Për zëra që nuk i tremben të vërtetës, që nuk fshihen pas hijes së partisë, por dalin përpara me vizion dhe përgjegjësi. Nëse kjo është fytyra e re e politikës shqiptare, atëherë ka ende arsye për të shpresuar.
