Aktiviteti në sektorët e hoteleve, bareve, restoranteve dhe transportit po regjistron një rritje të ndjeshme, duke tejkaluar ritmet e sektorëve të tjerë ekonomikë, falë ndikimit pozitiv të turizmit dhe kërkesës në rritje për këto shërbime.
Instituti i Statistikave (INSTAT) publikoi sot raportin “Statistikat afatshkurtra – Shërbimet”, që përmban të dhëna mbi shitjet neto, punësimin dhe pagat për aktivitetet që bëjnë pjesë në sektorin e shërbimeve për tremujorin e dytë të vitit. Sipas raportit, indeksi i shitjeve neto në volum u rrit me:
- 14,5% në hotele
- 10,4% në transport
- 9,1% në bare dhe restorante
Një rritje e konsiderueshme prej 11% u shënua edhe në aktivitetet e pasurive të paluajtshme, e nxitur nga kërkesa e shtuar për blerjen e apartamenteve, veçanërisht në zonat bregdetare nga shqiptarë që jetojnë jashtë dhe nga të huaj.
Sektori i hotelerisë shënoi gjithashtu rritje të ndjeshme të punësimit, me një ritëm prej 8,7%, më i lartë se sektorët e tjerë, që u rritën mesatarisht nga 0,7% deri në 3,7%. Ndërsa pagat në këtë sektor u rritën me 25,2% në tremujorin e dytë.
Aktiviteti në bare dhe restorante regjistroi një rritje të pagave prej 12%, ndërsa pagat për punonjësit në sektorin e pasurive të paluajtshme shënuan rritje prej 18,4%.
