Akademikja dhe inxhinierja e njohur Luljeta Bozo është rikthyer në Tropojë pas plot 51 vitesh, në një vizitë me rëndësi të veçantë kulturore e profesionale. E shoqëruar nga inxhinieri Kristaq Puleri, ajo vizitoi Kullat historike të Bujanit, monumente që mbartin vlera të jashtëzakonshme të trashëgimisë shqiptare dhe historisë së qëndresës së Malësisë së Gjakovës.
Në pritjen e tyre mori pjesë kryetari i Bashkisë Tropojë, Rexh Byberi, i cili u shpreh se vizita e profesoreshës Bozo përbën një nder të madh për Tropojën dhe një hap domethënës në misionin për ruajtjen dhe rivitalizimin e trashëgimisë kulturore të zonës.
“Ishte kënaqësi të shoqëroja inxhinieren Luljeta Bozo dhe inxhinierin Kristaq Puleri në Kullat e Bujanit. Këto monumente përmbajnë jo vetëm vlera arkitekturore e historike, por edhe shpirtin e qëndresës së Malësisë ndër shekuj. Me kontributin e tyre profesional, synojmë t’i bëjmë këto kulla të aksesueshme dhe të promovuara si asete të rëndësishme të turizmit kulturor,” deklaroi zoti Byberi.
Bashkia Tropojë ka aplikuar në fondet e Bashkimit Europian për Trashëgiminë Kulturore, me qëllim që restaurimi i Kullave të Bujanit të realizohet me standarde bashkëkohore dhe në përputhje me vlerat tradicionale të ndërtimit malësor.
Në këtë kuadër, Luljeta Bozo, kryetare e Shoqatës së Gjeoteknikëve të Shqipërisë, ka shprehur gatishmërinë për të dhënë kontributin e saj profesional në projektin e restaurimit. Ajo theksoi rëndësinë që kanë këto monumente në ruajtjen e identitetit kombëtar dhe në edukimin e brezave të rinj mbi historinë e vendit.
Vizita e profesoreshës Bozo në Tropojë përkon me një fazë të re të përpjekjeve të pushtetit vendor për të kthyer trashëgiminë kulturore në motor zhvillimi turistik. Pas suksesit me rivitalizimin e Kompleksit Muzeal në Bajram Curri, Kullat e Bujanit pritet të jenë destinacioni i radhës që do të marrë vëmendje të posaçme.
Kryebashkiaku Byberi e mbylli me një mesazh mirënjohjeje:
“Faleminderit profesoreshës Bozo për përkushtimin dhe dashurinë ndaj vendit. Rikthimi i saj pas më shumë se gjysmë shekulli në Tropojë është një mesazh frymëzues për të gjithë ne ,që dija, kujtesa dhe përkushtimi ndaj trashëgimisë janë gurë themeli të identitetit shqiptar.”