Rifitimi i lejes së drejtimit pas humbjes së pikëve po rezulton një sfidë për shumë drejtues mjetesh.
Vetëm 4 nga 28 kandidatët që iu nënshtruan ritestimit në sesionin e fundit arritën të kalojnë me sukses provimin, duke treguar vështirësitë që hasin drejtuesit që duhet të rifitojnë lejen e drejtimit.
Drejtoria e Përgjithshme e Shërbimeve të Transportit Rrugor (DPSHTRR) bëri të ditur se që nga nisja e fushatës së riregjistrimeve në qershor të vitit 2022, nga gjithsej 2,387 kandidatë, vetëm 321 kanë rifituar lejen e drejtimit, që përbën 13.4% të totalit.
Sipas DPSHTRR, drejtuesit që humbin pikët për shkak të shkeljeve të rënda apo të përsëritura të rregullave të qarkullimit duhet të riregjistrohen në autoshkollë dhe të ndjekin të gjithë procesin e testimit, sipas legjislacionit të ri në fuqi.
Qëllimi i kësaj procedure është garantimi i një qarkullimi më të sigurt dhe më të disiplinuar në rrugë, duke reduktuar rreziqet për të gjithë pjesëmarrësit në trafikun rrugor.
