Reshjet e para të borës kanë mbërritur më herët këtë vit, por Autoriteti Rrugor Shqiptar (ARRSH) dhe kompanitë e kontraktuara për mirëmbajtjen e rrugëve kanë ndërhyrë menjëherë për të garantuar qarkullimin e sigurt në akset kombëtare.
Pavarësisht se sezoni zyrtar i mirëmbajtjes dimërore nis më 15 nëntor, mjetet borëpastruese dhe skuadrat e punës kanë qenë në terren që në orët e para të mëngjesit të sotëm në zonat me reshje, në aksin Ura e Zapodit–Shishtavec dhe në Theth.
Zëvendëskryeministrja dhe njëherësh ministre e Infrastrukturës dhe Energjisë, Belinda Balluku, vlerësoi reagimin në kohë të strukturave të ARRSH-së dhe theksoi se gatishmëria do të vijojë pa ndërprerje për t’iu përgjigjur çdo situate të mundshme.
“Bora e parë ka ardhur herët këtë vit. ARRSH dhe kompanitë e mirëmbajtjes së rrugëve kanë qenë plotësisht të përgatitura, pavarësisht se mirëmbajtja dimërore nis më 15 nëntor sipas rregullores. Mjetet borëpastruese dhe skuadrat e punonjësve kanë qenë në terren që prej orëve të para të ditës së sotme në aksin Ura e Zapodit–Shishtavec dhe në Theth. Qarkullimi vazhdon normalisht në të gjitha akset nacionale”, theksoi Balluku.
Ministria e Infrastrukturës dhe Energjisë apelon për kujdes të shtuar nga drejtuesit e mjeteve, veçanërisht në zonat malore, dhe rikujton se rrugët nacionale janë nën monitorim të vazhdueshëm për të garantuar sigurinë rrugore dhe qarkullimin pa probleme.