Kryeministri Edi Rama ka uruar sot për ditëlindje ish-kryeministrin dhe liderin historik të Partisë Socialiste, Fatos Nano. Përmes një postimi, Rama e lidhi urimin me rrugëtimin e Shqipërisë drejt integrimit europian, duke theksuar se Nano ka një meritë të veçantë në transformimin e PS-së në një forcë politike të orientuar nga Europa.
“Në këtë ditë të shënuar të lindjes së tij – teksa pas hapjes së 4 kapitujve të tjerë të negociatave të anëtarësimit, po udhëtoj për të mbajtur një leksion në Kolegjin legjendar të Europës në Bruzh – më erdhi krejt natyrshëm dëshira që t’i uroj publikisht Fatos Nanos, liderit historik të Partisë Socialiste, një ditëlindje të gëzuar dhe jetë të gjatë 100 vjet.
Sot kur Shqipëria e sheh nga afër majën ku duhet të ngjitet pas një rrugëtimi të stërgjatë, dua të them se si pjesë e këtij rrugëtimi, Fatosi ka meritën e madhe që e ktheu partinë tonë në një forcë me sy e me zemër nga Europa dhe sikur ta mendosh për një moment, atë fazë të parë të historisë së Partisë Socialiste, në Shqipërinë e zhytur në vorbullën e rrumpallës demokratikase, pa Fatos Nanon në krye të saj, mendja të thotë se rruga jonë mund të kishte qenë shumë më gjatë.
Respekt, përqafime dhe gëzuar i dashur Kryetar.”
