Qeveria shqiptare ka përgatitur një projektligj të ri për menaxhimin e integruar të mbetjeve, duke e konsideruar këtë si kapitullin më sfidues në rrugën drejt Bashkimit Evropian. Kryeministri Edi Rama deklaroi se brenda këtij plani do të ngrihet një Operator kombëtar për trajtimin e mbetjeve, i cili do të koordinojë aktivitetet në të gjithë vendin.
Rama vlerësoi përparimet e disa bashkive, duke nisur nga Lezha, që vazhdon të udhëheqë me shembullin e pastërtisë, e më pas Shkodra, Durrësi dhe Himara. Ai theksoi se rezultatet janë më të mira se vitin e shkuar dhe se ritmi i reformave dhe masave ligjore duhet të intensifikohet për të arritur objektivin kombëtar: anëtarësimin në BE deri në fund të dekadës.
Kryeministri u bëri thirrje të gjithë personave me funksion publik, si të zgjedhur ashtu edhe nëpunës shtetëror, të vetëvlerësojnë përkushtimin ndaj këtij kapitulli kritik të negociatave dhe përgjegjësinë për mjedisin.