Kryeministri Edi Rama theksoi sot se ka nisur puna për krijimin e Agjencisë Kombëtare të Planifikimit, Zhvillimit Urban dhe Strehimit.
Kreu i qeverisë, e bëri deklaratën gjatë podkastit “Flasim”, në rubrikën “Shënimet e javës”, ku u shpreh se kjo agjenci do të adresojë një sërë problematikash, si nga rritja e volumit të cilësisë së investimeve për strehim social te mundësia e strehimit nën çmimet e tregut.
Një tjetër element, sipas Ramës në fokus të kësaj agjencie do të jetë edhe fuqizimi i kapaciteteve vendore në fushën e planifikimit dhe deri te lehtësimi i proceseve të zhvillimit urban.
“Kjo agjenci do të menaxhojë edhe fondin e gjelbër, të cilin do ta krijomë me kontributet në pemë, që sipas ndryshimeve ligjore në fuqi janë detyrim i ndërtuesve në raport me metrat katrorë në ndërtim”, tha Rama.
Agjencia Kombëtare ë Planifikimit, Zhvillimit Urban dhe Strehimit do të trajtojë në një mënyrë të re çështjen e strehimit, duke u fokusuar si te strehimi social, ashtu edhe te incentivimi për krijimin e mundësive që kategori të ndryshme shoqërore të kenë akses në banesa me çmime më të përballueshme.