Presidenti rus, Vladimir Putin, përdori tone kërcënuese ndaj Europës dhe NATO-s, duke u zotuar se Moska do të përgjigjet me shpejtësi ndaj çdo provokimi të mundshëm. Ai kritikoi atë që e përshkroi si militarizim histerik të kontinentit dhe shtoi se Rusia nuk ka ndërmend të sulmojë aleancën ushtarake të udhëhequr nga SHBA, por nuk do të lejojë asnjë dobësi apo pavendosmëri.
“Çdo kush që e konsideron Rusinë një kërcënim për ekzistencën e saj duhet ta mbajë mend këtë,” deklaroi Putin. Ai gjithashtu shprehu mirënjohje ndaj shumicës së botës që mbështet një zgjidhje paqësore të konfliktit në Ukrainë, duke përmendur tre vende miqësore në Europë: Serbinë, Hungarinë dhe Sllovakinë.