Presidenti rus Vladimir Putin e vlerësoi marrëdhënien me Kinën si “në një nivel të paparë”, gjatë vizitës së tij zyrtare në Pekin ku u nënshkrua marrëveshja për ndërtimin e tubacionit strategjik të gazit “Fuqia e Siberisë-2”. Projekti do të lidhë Rusinë me Kinën përmes Mongolisë dhe do të transportojë deri në 50 miliardë metra kub gaz në vit, duke kompensuar humbjet e Moskës në tregun europian pas sanksioneve perëndimore.
Pas takimit trepalësh me Xi Jinping dhe presidentin mongol Ukhnaagiin Khurelsukh, Gazprom njoftoi se kontrata 30-vjeçare e furnizimit është ligjërisht e detyrueshme dhe çmimi i gazit do të jetë më i ulët se ai për vendet europiane.
Putin dhe Xi theksuan se marrëdhëniet dypalëshe kanë “rezistuar provës së kohës” dhe përfaqësojnë një “aleancë natyrore” në epokën e re, duke sfiduar rendin perëndimor. Putin zbuloi gjithashtu se i kishte ndarë me Xi detaje nga bisedimet që pati muajin e kaluar në Alaska me presidentin amerikan Donald Trump mbi luftën në Ukrainë.
Vizita e Putinit në Kinë, më e gjata në një vend që nga fillimi i luftës në Ukrainë, do të kulmojë të mërkurën me një paradë ushtarake ku pritet të marrë pjesë edhe lideri i Koresë së Veriut, Kim Jong Un, duke shënuar një front të qartë kundër SHBA-së dhe aleatëve të saj.