Këshilltarët socialistë kanë depozituar projekt-vendimin për shkarkimin e Erion Veliajt nga posti i kryebashkiakut të Tiranës.
Kërkesa e firmosur nga grupi i mazhorancës mbështetet në nenin 62 të ligjit “Për Vetëqeverisjen Vendore”, i cili parashikon se kryebashkiaku shkarkohet me vendim të Këshillit të Ministrave, kur propozohet nga Këshilli Bashkiak për mosparaqitje në detyrë për më shumë se 3 muaj rresht.
Veliaj, i arrestuar prej muajit shkurt, ka kërkuar të jetë i pranishëm në mbledhjen ku do të votohet shkarkimi i tij. Në letrën dërguar Këshillit, ai thekson se mungesa nuk është e qëllimshme, por e imponuar nga masa e sigurisë që do ta kundërshtojë në gjykatë. Ai kërkon që të dëgjohet përpara se të merret vendimi.
Shkarkimi i Veliajt i hap rrugë zgjedhjeve të parakohshme në Tiranë. PS ka vendosur që kandidatja socialiste të jetë Ogerta Manastirliu, emri i së cilës u shpall gjatë Asamblesë së PS më 11 shtator.