Policia e Shtetit, gjatë konferencës ku njoftoi finalizimin e operacionit “Xuex”, paralajmëroi qytetarët për rreziqet e skemave piramidale online.
Autoritetet theksuan se përdorimi i kriptomonedhave në këto skema nuk ishte rastësor. Ato u zgjodhën për vështirësinë në gjurmim dhe për perceptimin e gabuar që kanë tek shumë qytetarë si mjete “moderne” dhe të sigurta për investim.
“Ky rast duhet të shërbejë si thirrje e fortë për ndërgjegjësimin e qytetarëve: mos besoni në ‘investime të sigurta’ që premtojnë fitim të menjëhershëm.
Mos lejoni që emocionet, dëshira për përfitim të shpejtë apo presioni nga persona të njohur t’ju shtyjë të bëheni pjesë e strukturave të tilla. Ato nuk janë mundësi investimi – janë mashtrime të strukturuara, të sofistikuara dhe të rrezikshme, ku gjithmonë humbin më të pambrojturit”, njofton Policia.
