Në datën 15 nëntor, në qytetin e Shkodrës u zhvillua aktiviteti i radhës, “Kupa e Republikës” në pingpong ku morën pjesë 10 ekipe nga e gjithë Shqipëria. Kompeticioni u shënua nga një nivel i lartë gare dhe ndeshje të forta, duke sjellë një atmosferë të ngarkuar me emocion e rivalitet sportiv.
Në këtë kuadër, pingpongu elbasanas konfirmoi edhe një herë dominimin e tij. Ekipi i meshkujve, i përbërë nga djem të talentuar dhe të palodhur, arriti të fitojë trofeun e Kupës së Republikës, duke vijuar sukseset e njëpasnjëshme.
Brenda një periudhe të shkurtër, ata kanë rrëmbyer si Kampionatin Kombëtar, ashtu edhe Kupën, duke treguar se rezultatet nuk janë rastësi, por fryt i punës së përkushtuar dhe disiplinës së lartë sportive.
Këto arritje e bëjnë KS Elbasanin krenar, duke forcuar pozicionin e tij si një ndër qendrat më të rëndësishme të pingpongut shqiptar. Ekipi drejtohet nga trajnerët Gëzim Tosuni dhe Greta Kovaçi, të cilët me profesionalizëm dhe vizion po e çojnë sportin elbasanas drejt majave të reja.
