Bashkia e Librazhdit, nën kujdesin e kryetarit Z. Mariglen Disha, organizon këtë fundjavë aktivitetin e veçantë kulturor “Ngjyra Pranverore”, një ditë e dedikuar artit, muzikës dhe krijimtarisë, që do të zhvillohet më 5 prill 2026 në Pallatin e Kulturës “Sadi Halili”.
Programi i ngjarjes nis paraditen e së shtunës me pritjen e të ftuarve dhe mirëseardhjen në atmosferën e ngjyrave të stinës. Në orën 11:11 do të hapet zyrtarisht aktiviteti me fjalën e hapjes nga Znj. Bardha Alimeta, përgjegjëse për Kulturën në Bashkinë Librazhd.
Një nga momentet kryesore të ditës është sesioni i diskutimit, ku kritikë arti dhe piktorë të ftuar do të ndajnë perspektivat e tyre mbi artin bashkëkohor dhe rolin e tij në komunitet. Pas këtij sesioni, vizitorët do të kenë mundësinë të përjetojnë arti “live” përmes pikturave të krijuara nga artistët e vegjël, duke sjellë pranverën në tablo para syve të tyre.
Pjesëmarrësit do të shijojnë gjithashtu:
• Ekspozitë pikture me veprat e artistëve të rinj dhe të njohur
• Momente muzikore me tinguj të muzikës klasike
• Koktej dhe mundësi për rrjetëzim me artistët dhe gazetarët e ftuar
Momenti i veçantë i aktivitetit është pikturimi “live” nga artistët e vegjël, një eksperiencë që do të krijojë kujtime të paharrueshme për të ftuarit. Programi përfundon në orën 13:00 me fotografinë e përbashkët, duke shënuar mbylljen e një dite të mbushur me ngjyra, art dhe kreativitet.
Bashkia Librazhd fton të gjithë të apasionuarit pas artit pamor dhe ata që dëshirojnë një fundjavë ndryshe, për t’u bashkuar në këtë ngjarje unike pranverore.