Sot, qyteti i Elbasanit u kthye në një simbol të fuqishëm të bashkimit, dialogut dhe ndërgjegjësimit qytetar, teksa u mbajt Marshimi i Paqes 2026, një aktivitet madhor i dedikuar mjedisit, paqes dhe përgjegjësisë ndaj brezave të ardhshëm. Marshimi u organizua nga Qendra e Bashkëpunimit Ndërfetar (QBNFE) dhe mblodhi përfaqësues të institucioneve shtetërore, komuniteteve fetare, arsimit, shoqërisë civile, si dhe dhjetëra qytetarë.
Aktiviteti u hap në Sheshin para stadiumit “Elbasan Arena” në orën 11:00, nën moderimin e Ilirian Gjonit, anëtar i Bordit të QBNFE-së. Fjalën e hapjes e mbajti Dr. Arben Ramkaj, Kryetar i Qendrës së Bashkëpunimit Ndërfetar, i cili theksoi lidhjen e pandashme mes paqes dhe një mjedisi të shëndetshëm.
Në fjalimin e tij, Dr. Ramkaj nënvizoi se mjedisi nuk është një koncept i largët, por ajri që thithim, uji që pinë fëmijët tanë dhe toka ku ata rriten. Ai theksoi se paqja e vërtetë ndërtohet përmes kujdesit për jetën dhe shëndetin e tjetrit, duke rikujtuar se nuk mund të ketë paqe të qëndrueshme pa një mjedis të pastër.
Elbasani është shtëpia jonë,” u shpreh Ramkaj, “një qytet me histori e kulturë, por edhe me sfida reale mjedisore që kërkojnë veprim të përbashkët.” Mesazhi i tij u përmbyll me thirrjen që mjedisi të shihet si trashëgimi, jo si barrë, sepse ajo që u lëmë fëmijëve sot, ata do ta quajnë jetë nesër.
Gjatë Marshimit të Paqes u mbajtën një sërë fjalimesh nga përfaqësues të nivelit qendror dhe vendor.Arbjan Mazniku, i deleguari i Qarkut Elbasan për PS, foli mbi legjislacionin dhe politikat për një mjedis të pastër.Gledjan Llatja, Kryetar i Bashkisë Elbasan, prezantoi vizionin për “Elbasanin e gjelbër”, duke theksuar përgjegjësinë qytetare.Andis Salla, Ministër i Bujqësisë dhe Zhvillimit Rural, e cilësoi mjedisin si prioritet strategjik kombëtar.Ermira Urupi, Kryetare e Këshillit të Qarkut Elbasan, foli për zhvillimin rajonal në harmoni me mjedisin.
Një vëmendje e veçantë iu kushtua rolit të arsimit në edukimin mjedisor. Kontribute sollën:
• Vesa Liço, Drejtoreshë e ZVA Elbasan
• Anila Çota, Drejtoreshë e Shkollës “Qamil Guranjaku”
• Blerta Tola, Drejtoreshë e “Green School Albania”
Nxënësit e shkollës “Qamil Guranjaku” realizuan prezantime simbolike, duke treguar se ndërgjegjësimi nis që në bankat e shkollës.
Pas fjalimeve, marshimi vijoi përgjatë bulevardit “Aqif Pasha”, me ndalesa simbolike:
• Te busti Kozma Naska, ku Myftiu i Elbasanit, H. Agim Duka, foli për rolin e besimit në ruajtjen e ekuilibrave natyrorë, ndërsa Metropoliti Hirësi Andoni theksoi shenjtërinë e gjithësisë.
• Te busti Kostandin Kristoforidhi, ku përfaqësues të besimeve fetare ,Don Emilio Valente, Baba Ardit Selmani dhe Pastor Ilirian Isaraj ,përcollën mesazhe të forta mbi kujdestarinë ndaj Tokës si amanet hyjnor.
Në Sheshin “Aqif Pasha”, Dr. Florenc Spaho foli për aktivizmin civil dhe kalimin nga ndërgjegjësimi në veprim konkret. Aktiviteti u shoqërua edhe me interpretimin muzikor “Fratello Sole Sorella Luna” nga Lukë Mllugja, duke i dhënë marshimit një dimension artistik e shpirtëror.
Marshimi u mbyll me urimin për një vit të mbarë 2026 nga Don Doriani, zëvendëspresident i QBNFE-së, i cili bëri një thirrje të hapur për veprim konkret dhe përkushtim të përbashkët për një të ardhme më të gjelbër.
Marshimi i Paqes 2026 në Elbasan u dëshmua si një shembull i fuqishëm se kur institucionet, besimet, arsimi dhe qytetarët bashkohen, paqja dhe mjedisi shndërrohen nga fjalë në veprim.
