AF Elbasani zbret nesër në stadiumin “Air Albania” për një nga përballjet më të rëndësishme të sezonit, teksa do të sfidojë Dinamo City në një duel që mund të peshojë shumë në garën për titullin kampion. Verdheblutë synojnë një rezultat pozitiv për të mbajtur gjallë ëndrrën dhe për të mos lëshuar kreun në këtë fazë vendimtare.
Pavarësisht disa mungesave për shkak dëmtimesh, atmosfera në kampin elbasanas paraqitet e qetë dhe optimiste. Forma e mirë në javët e fundit ka rritur besimin te skuadra, që shkon në këtë sfidë me moral të lartë.
Në daljen përpara mediave, trajneri Ivan Gvozdenoviç u shpreh i bindur se ekipi i tij është i përgatitur për të dhënë maksimumin në fushë, duke theksuar se objektivi është i qartë: rezultat pozitiv në një transfertë delikate.
Tekniku serb u ndal edhe te mungesat, por nënvizoi se forca e AF Elbasanit mbetet grupi dhe se ka besim të plotë tek lojtarët që do të zbresin në fushë për të përfaqësuar denjësisht skuadrën.
Sa i përket garës për titull, Gvozdenoviç vlerësoi rivalët, por u shpreh se AF Elbasani do të luftojë deri në fund për objektivin madhor, pa humbur fokusin nga ndeshja e radhës.
AF Elbasani vjen në këtë përballje si një nga kryesuesit e kampionatit, me pikë të barabarta me Vllazninë, dhe synon që pas kësaj jave të ruajë pozicionin në majë, duke konfirmuar ambiciet për titull.