ELBASAN,23 prill 2026/Albania Express News/Një mbrëmje e veçantë artistike u zhvillua mbrëmjen e kësaj mesjave në ambientet e Teatri Skampa, ku publiku elbasanas përjetoi koncertin “Muzë e Shpirtit të Lirë”, një event që solli emocione të forta dhe elegancë muzikore në çdo notë.
Në skenë u ngjit një trio e talentuar artistesh, të cilat dhuruan një performancë të ndjerë dhe me nivel të lartë profesional: Matilda Bajrami në flaut, Xhovana Marku në oboe dhe Ardita Bufaj në piano. Interpretimi i tyre i harmonizuar krijoi një atmosferë të rrallë, ku ndjeshmëria artistike u ndërthur me finesën dhe virtuozitetin, duke prekur thellë audiencën.
Ky koncert erdhi si një dëshmi e qartë e rëndësisë që ka promovimi i muzikës së kultivuar dhe mbështetja e artistëve profesionistë në skenat shqiptare. Nën drejtimin artistik të Mjeshtrit të Madh ,Blerim Narazani, aktiviteti mori një dimension të veçantë artistik, ndërsa në rolin e Drejtorit të Produksionit ishte Klikon Kapaj, i cili kontribuoi në realizimin me sukses të kësaj mbrëmjeje.
Koncerti “Muzë e Shpirtit të Lirë” u mirëprit ngrohtësisht nga publiku, i cili e shpërbleu performancën me duartrokitje të gjata, duke konfirmuar edhe një herë se arti i vërtetë di gjithmonë të gjejë rrugën drejt zemrave të njerëzve.
