Ish-trajneri dhe portieri i njohur i Elbasanit, Muharrem Dosti, ka vlerësuar nisjen e sezonit për verdheblutë, duke e cilësuar atë si pozitive dhe premtuese për vazhdimësinë e kampionatit.
Dosti thekson se skuadra ka treguar karakter dhe përqendrim në ndeshjet e para, elementë që i japin besim se Elbasani mund të qëndrojë në zonën e lartë të renditjes dhe të luftojë për objektiva të mëdhenj.
Duke folur për humbjen e parë ndaj Vllaznisë, ish-portieri shprehet se ajo nuk duhet parë si dështim, por si një mësim i vlefshëm. “Humbja mund të pranohet, sidomos kur vjen ndaj një ekipi si Vllaznia dhe në Shkodër. Ndonjëherë është më mirë të ndodhë tani se më vonë, sepse i jep trajnerit mundësinë të rregullojë ndonjë defekt. Kjo është një mundësi për skuadrën të përmirësohet dhe të mësojë nga gabimet,” tha Dosti.
Në prag të dueleve të radhës ndaj Vorës dhe Bylisit, të dyja në shtëpi, Dosti shprehu bindjen se Elbasani ka potencial për të marrë maksimumin. Ai thekson rëndësinë e përqendrimit dhe disiplinës, pavarësisht mungesave të lojtarëve të rëndësishëm si Dialo dhe Ibrahimi.
Dosti thekson se objektivi “Final 4” është i arritshëm: “Skuadra duhet të shikojë çdo ndeshje një nga një, pa stres, duke ruajtur vetëbesimin dhe ritmin e lojës. Me atë që kam parë këto javë kampionat, e shoh si të realizueshëm,” u shpreh ai.