Milani është rikthyer te fitoret në Serinë A, duke triumfuar 1-0 ndaj Romës në “San Siro”, në një përballje direkte për zonën e kreut. Takimi nisi me ritëm të lartë nga të dyja skuadrat, me verdhekuqtë që tentuan disa herë të rrezikonin portën e Maignan.
Megjithatë, momenti vendimtar erdhi në minutën e 39’, kur Rafael Leao bëri një aksion fantastik individual, kaloi mbrojtjen e Romës dhe asistoi saktë për Pavlovic, i cili shënoi golin e avantazhit për kuqezinjtë.
Në pjesën e dytë, Roma pati mundësinë më të artë për të barazuar, pasi gjyqtari akordoi një penallti në minutën e 82’. Paulo Dybala mori përgjegjësinë, por goditja e tij u ndal nga një Maignan spektakolar, duke ruajtur epërsinë e Milanit.
Në minutat e fundit, skuadra e drejtuar nga Allegri menaxhoi me qetësi rezultatin dhe siguroi një fitore të rëndësishme. Me këtë sukses, Milani ngjitet në vendin e tretë me 21 pikë, njësoj sa Roma dhe Interi, ndërsa kryesimin e mban Napoli me një pikë më shumë.