Pasi u pyet rreth dy orë nga prokurorët e SPAK, Sali Berisha tregoi para gazetarëve detaje të pa thëna më parë për ngjarjen tragjike të 21 janarit ku u vranë 4 persona në Bulevard.
Berisha këmbënguli se nuk është dhënë asnjë urdhër nga kryeministria për të qëlluar me armë ndaj tyre. Kreu i PD tregoi se Basha ka shkuar në zyrën e tij së bashku me ministrin dhe komandantin e Gardës dhe i kërkuan të evakuohej, por ai qëndroi në Zyra.
“Absolutisht asnjë urdhër. Asnjë urdhër nuk është dhënë për të qëlluar. Asnjë urdhër dhe kurrë. Nuk mund të jepet urdhër. Po, Basha ka ardhur në zyrën time dhe ka kërkuar nga unë, sepse ishin thyer xhamat me plumba apo me gurë, tek dritarja ngjitur me tavolinën time dhe ministri, komandanti i Gardës kanë ardhur dhe më kanë thënë të evakuojmë, jo i thashë. Sepse unë isha jashtë me ambasadoren gjermane dhe u futa drejt e në zyrë. Unë isha në detyrë.
Të shkosh në një zyrë tjetër, jo unë isha në detyrë. Kjo është zyra ime. Kryeministri nuk mund të bëjë zyrat sipas qejfit, është institucion kushtetues kryeministri. Kjo ka qenë kërkesa e tyre dhe unë kam qëndruar në zyrë deri në fund. Aty ka pasur një ndërmjetësim ndërkombëtar. Ka ndërmjetësuar ambasadori i SHBA-së dhe çdo oficer i kërkuar nga prokuroria është paraqitur në prokurori, por në ndjekje të lirë sepse Edi Rama dhe Ina Rama kërkonin që të eliminonin zinxhirin e komandës në një kohë kur Edi Rama kishte deklaruar se, beteja tjetër do të ishte vendimtare dhe secili nga gardistët e thirrur janë paraqitur në prokurori“-u shpreh Berisha.
Teksa pretendoi se audio është falsifikuar, Berisha u pyet nga gazetarët se pse shefi i gardës u shfaq me sy të nxirë pas 21 janarit.
“Çfarë ka ndodhur e shpjegon vetë secili. Ndrea Prendi ka qenë në krye të detyrës gjatë gjithë ditës dhe në vlerësimin tim ai ka bërë të pamundur për të bërë detyrën ligjore.”
