Policia e Shkodrës ka shpallur në kërkim dy persona, të dyshuar për përfshirje në masakrën e ndodhur dje në lagjen “Qemal Stafa”, ku autori Ragip Gila qëlloi me armë zjarri, duke shkaktuar vdekjen e 2 personave dhe plagosjen e 2 të tjerëve.
Në kërkim:
- Barush Bregu (Bajram Bregu), 39 vjeç
- Një 17-vjeçar
Ata dyshohet se kanë siguruar armatimin dhe mjetet e tjera për kryerjen e krimeve.
Sekuestrime gjatë kontrollit:
Kontrollet u zhvilluan në një banesë në lagjen “Guerrile”, e cila i ishte përdorur shtetasve në kërkim si bazë për aktivitetet kriminale. Aty u gjetën dhe u sekuestruan:
- 7 armë zjarri (1 automatik dhe 6 pistoleta)
- 45 kapsolla detonatore elektrike
- Municion luftarak
- Një automjet tip “Audi” me targa të vjedhura
- 5 dronë dhe pajisje shtesë për to
- 1 laptop dhe 5 aparate fotografike
Arrestimi i autorit:
Shtetasi R. G., 28 vjeç, u arrestua në flagrancë dhe akuzohet për:
- “Vrasja në rrethana të tjera cilësuese”
- “Vjedhja me armë”
- “Shkatërrimi i pronës”
- “Mbajtja pa leje dhe prodhimi i armëve, armëve shpërthyese dhe municionit”
- “Vjedhja”
Gjatë arrestimit, tek R. G. u gjetën gjithashtu:
- 2 armë zjarri (1 automatik dhe 1 pistoletë me fishek në fole)
- Skafandër, maskë, jelek antiplumb dhe shishe 1.5 litra me lëndë djegëse
- Automjeti që përdori për t’u larguar dhe një motomjet pa targë
Veprimet hetimore vazhdojnë:
Policia po punon për kapjen e dy të shpallurve në kërkim dhe dokumentimin e plotë të veprimtarive kriminale të tyre. Materialet procedurale janë referuar Prokurorisë së Shkodrës për veprime të mëtejshme.
