Në një zhvillim me rëndësi për forcimin e bashkëpunimit ndërinstitucional dhe promovimin e vlerave të paqes në nivel lokal, Federata e Paqes Universale – Shqipëri dhe Bashkia Peqin nënshkruan të martën, më 21 tetor 2025, një Marrëveshje Bashkëpunimi, me synim thellimin e partneritetit për veprimtari të përbashkëta në shërbim të qytetarëve.
Delegacioni i Federatës së Paqes Universale, i përbërë nga Kryetari z. Defrim Methasani, Kryetari i Këshillit Rajonal të Paqes Elbasan z. Fatmir Popja, Kryetarja e Këshillit të Paqes Peqin znj. Paola Sula dhe Sekretari i Përgjithshëm z. Gani Rroshi, u prit në një takim zyrtar nga Kryetari i Bashkisë Peqin, z. Bukurosh Maçi.
Marrëveshja e nënshkruar mes dy institucioneve ka për qëllim promovimin e vlerave qytetare, ruajtjen e trashëgimisë kulturore dhe fuqizimin e kapaciteteve drejtuese lokale, në funksion të qeverisjes së mirë dhe ndërtimit të një komuniteti të harmonizuar e të ndërgjegjshëm qytetar.
Në kuadër të kësaj vizite zyrtare dhe me propozimin e Këshillit Rajonal të Paqes Elbasan dhe Këshillit të Paqes Peqin, Kryetari i Bashkisë Peqin, z. Bukurosh Maçi, u vlerësua me titullin “Ambasador për Paqe”, një nderim simbolik që Federata e akordon për figura me kontribut të veçantë në nxitjen e dialogut, bashkëpunimit dhe harmonisë në shoqëri.
Ky vlerësim vjen si një njohje ndaj angazhimit të vazhdueshëm të Kryetarit Maçi për ndërtimin e një bashkie gjithëpërfshirëse, të hapur ndaj qytetarëve dhe me fokus te kohezioni social dhe zhvillimi i qëndrueshëm lokal.
Federata e Paqes Universale është një organizatë ndërkombëtare me prani në mbi 160 vende të botës, e angazhuar në ndërtimin e paqes përmes dialogut ndërkulturor, bashkëpunimit ndërinstitucional dhe përfshirjes së komuniteteve në procese të qëndrueshme zhvillimi dhe edukimi qytetar.