Në kryeqytet nuk ka ende një të dhënë zyrtare mbi numrin e automjeteve të braktisura në parkingjet apo hapësirat publike, por Policia Bashkiake ka nisur procedurat për konfiskimin e tyre.
Një marrëveshje mes Agjencisë së Administrimit të Pasurive të Sekuestruara dhe Policisë Bashkiake parashikon se, nëse pronarët nuk i largojnë mjetet brenda 30 ditëve nga njoftimi, ato do të konfiskohen.
Shefja e Policisë Bashkiake të Tiranës, Elona Lalaj, tha për “Top Channel” se procesi i njoftimit ka filluar:
“Duhet të bëhet një praktikë e plotë. Drejtuesve u lihet një afat 30-ditor për të larguar mjetin. Nëse afati skadon dhe mjeti nuk është lëvizur, atëherë Policia Bashkiake ndërhyn dhe e konfiskon sipas marrëveshjes së nënshkruar,” – shpjegoi Lalaj.
Pas bllokimit të mjetit, qytetari humb të drejtën e pronësisë dhe makina i kalon Agjencisë së Pasurive të Sekuestruara.
Sipas Lalajt, shumë banorë të Tiranës kanë ndihmuar përmes postimeve dhe denoncimeve në portalin e bashkisë, duke sinjalizuar automjete të parkuara prej vitesh e të lëna pas dore.
“Falënderoj qytetarët për njoftimet dhe i nxis të vijojnë të raportojnë. Por njëkohësisht u bëj thirrje të lirojnë hapësirat publike në mënyrë vullnetare. Në të kundërt, Policia Bashkiake do veprojë me bazën ligjore që ka në fuqi,” – përfundoi Lalaj.
