Ministria e Pushtetit Vendor, Ambasada Suedeze dhe ajo Zvicerane e rendisin Bashkinë e Librazhdit në Top 10 bashkitë më me performancë në vend
Nga Fatmir Popja
Bashkia e Librazhdit është zyrtarisht një ndër dhjetë bashkitë me performancën më të mirë në Shqipëri për vitin 2024. Ky vlerësim prestigjioz vjen nga Ministria e Pushtetit Vendor, në bashkëpunim me Ambasadën Suedeze dhe atë Zvicerane, të cilat prezantuan sistemin e ri të matjes së performancës bashkiake ,një mekanizëm modern që synon rritjen e transparencës, efikasitetit dhe standardeve të qeverisjes vendore.
Prezantimi i raportit u bë të martën, më 25 nëntor, në Tiranë nga Ministri për Pushtetin Vendor, Ervin Demo, i cili solli gjetje të rëndësishme mbi mënyrën se si bashkitë shqiptare po avancojnë drejt modelit europian të administrimit lokal.
Librazhdi, në elitën e qeverisjes vendore
Sipas ministrit Demo, Librazhdi, së bashku me bashkitë Mat, Kolonjë, Prrenjas, Pukë, Fushë-Arrëz, Shijak, Dropull e të tjera, ka performuar mbi mesataren kombëtare në tre fusha kyçe:
• Menaxhimi financiar
• Ofrimi i shërbimeve publike
• Mirëqeverisja dhe integrimi europian
Kjo performancë e lartë i jep Librazhdit të drejtën të përfitojë një transfertë të posaçme financiare, si stimul për vijimin e reformave dhe përgatitjen e projekteve me standarde të BE-së.
Të ardhurat e bashkive trefishohen, Librazhdi pjesë e progresit kombëtar
Gjatë fjalës së tij, ministri Demo theksoi se bashkitë shqiptare kanë shënuar “progres historik” në vitin 2024.
Ai nënvizoi:
• Të ardhurat e bashkive nga burimet e veta kanë arritur 44.4 miliardë lekë, trefish më shumë se në vitin 2015.
• Të ardhurat nga taksa e pasurisë janë rritur me 84.6% në 9 vitet e fundit.
• Detyrimet e prapambetura janë ulur nga 12 miliardë lekë në 2015, në vetëm 3.1 miliardë lekë në 2024, një arritje që ai e cilësoi “model disipline fiskale”.
Këto tregues konfirmojnë një administrim financiar shumë më efikas, ku bashkia e Librazhdit e drejtuar nga Mariglen Disha del në krye si një prej bashkive më të përparuara dhe më transparente.
Shërbime më të mira, standarde europiane
Raporti i performancës evidentoi përparim të ndjeshëm në disa sektorë kritikë:
• Mbulimi i kostos së menaxhimit të mbetjeve u rrit nga 68% në 2023 në 83% në 2024.
• Sistemi arsimor parashkollor po afrohet me standardet e BE-së në raportin fëmijë–mësues.
• Sektori i ujitjes dhe kullimit ka pësuar përmirësime strukturore që ndikojnë drejtpërdrejt te komuniteti.
Librazhdi, si një prej bashkive më të vlerësuara, është renditur për shkak të angazhimit të qëndrueshëm në përmirësimin e shërbimeve dhe implementimin e praktikave moderne të administrimit lokal.
Grantet e Performancës: Çelësi i transformimit vendor
Ministri Demo theksoi se “Grantet e Bazuar në Performancë” kanë krijuar një kulturë të re konkurruese mes bashkive:“Ky mekanizëm nuk është thjesht financim, por një ushtrim real europian. Të 61 bashkitë e vendit janë pajisur me plane strategjike dhe janë gati për projektet me fondet europiane.”
Librazhdi përfiton nga ky mekanizëm për shkak të strategjive të qarta, menaxhimit të përgjegjshëm dhe orientimit drejt transparencës.
Sistemi i ri kombëtar i të dhënave vendore
Në fund, Demo bëri të ditur nisjen e bashkëpunimit me INSTAT dhe institucione të tjera për ngritjen e një sistemi të integruar të të dhënave vendore, i cili do të shërbejë si bazë për vendimmarrje të sakta dhe matje të vazhdueshme të performancës.
Një vit i artë për Bashkinë Librazhd
Vlerësimi si një ndër 10 bashkitë me performancën më të mirë në Shqipëri për vitin 2024 përbën një sukses të madh për Bashkinë Librazhd dhe një konfirmim të punës serioze që po bëhet në funksion të qytetarëve.
Librazhdi jo vetëm që po përparon me ritme të shpejta, por po vendos standarde të reja në qeverisjen vendore, duke u kthyer në një shembull të modelit europian të administrimit lokal.
