Sot në orën 10:00 nis seanca plenare, e cila ka në rend dite votimin e kërkesës së SPAK-ut për dhënien e autorizimit për arrestimin e ish-zv.kryeministres Belinda Balluku.
Njëkohësisht me seancën, jashtë godinës pritet të nisë protesta që ka thirrur Partia Demokratike. Ndryshe nga protestat e shkuara të zhvilluara gjatë mbrëmjeve, sot PD ka ndryshuar skenarin dhe pritet që tubimi të zhvillohet vetëm jashtë godinës së Kuvendit.
Që prej mbrëmjes së të mërkurës Parlamenti është blinduar dhe ka shtuar masat e sigurisë, për të shmangur përshkallëzimin e protestës.
Parlamenti është rrethuar me gardh metalik si masë paraprake për tubimin e Partisë Demokratike.
Top Channel mëson se ligjvënësit socialistë do të përpiqen të hyjnë të parët në seancë, për të shmangur kontaktin me protestuesit e opozitës, të cilët janë thirrur të rrethojnë parlamentin.
Brenda sallës, mazhoranca dhe opozita pritet të përplasen ashpër mbi kërkesën e SPAK, e cila insiston në heqjen e lirisë së Belinda Ballukut.
Partia Socialiste ka deklaruar votën kundër dhënies se autorizimit, ndërsa PD, në mungesë të kartonëve, ka në plan të tregojë forcën si brenda dhe jashtë kuvendit ku ka thirrur në ndihmë mbështetësit e saj.
Përditësimet LIVE, 11 mars
21:54 Seanca për Ballukun, socialistët i paraprijnë me mbledhje grupi në Parlament
Pak minuta më parë deputetët socialist kanë marrë një mesazh nga kryetari i grupit Taulant Balla për seancën e nesërme në parlament, ku do të votohen dy raportet për ish zëvendës-kryeministren Belinda Ballukun.
21:30 Protesta e PD-së përpara Kuvendit, Ambasada Amerikane thirrje qytetarëve të saj: Shmangni zonat ku do të ketë përplasje dhe qëndroni vigjilent
Ambasada e Shteteve të Bashkuara në Tiranë ka paralajmëruar qytetarët amerikanë në lidhje me protestën e planifikuar nga Partia Demokratike ditën e nesërme më 12 mars, përpara Kuvendit.
20:34 Protesta e opozitës/ Parlamenti blindohet me gardh metalik, shtohen masat e sigurisë pak orë para revoltës së demokratëve
Pak orë para seancës plenare, kur demokratët do të protestojnë brenda dhe jashtë sallës së seancave plenare, Parlamenti ka kaluar në masa të përforcuara të sigurisë.
13:35 “Nesër shënohet një etapë e re vendimtare”, Berisha një ditë para protestës: Opozita do të udhëheqë kryengritje paqësore
Kreu i Partisë Demokratike, Sali Berisha, gjatë konferencës për gazetarët, foli për protestën e nesërme, që do të mbahet në orën 10:00.
Sipas kryedemokratit dita e nesërme do të shënojë një etapë të re vendimtare për vendin, ndërsa shtoi se ‘opozita do të udhëheqë kryengritjen paqësore që do të rrëzojë regjimin’.
13:35 Zgjedhjet brenda PS, Klosi për “Shqipëria Live”: Diskutime ka, por për vendimet e mëdha jemi 100% të unifikuar. Balluku s’ka akuzë për korrupsion
Sekretari i Përgjithshëm i PS, Blendi Klosi ishte i ftuar në “Shqipëria Live” në Top Channel, ku foli për seancën e nesërme, çështjen e Belinda Ballukut, si dhe protestën e PD.
Socialisti komentoi çështjen e Ballukut, ku tha se ndaj saj s’ka asnjë akuzë për korrupsion, ndërsa shtoi se PS nuk ka penguar hetimin ndaj saj.