Një përfaqësim i rëndësishëm në nivel evropian i është bërë Shqipërisë nga kryetarja e Këshillit të Qarkut Elbasan, Zj. Ermira Urupi, e cila së bashku me përfaqësues të tjerë të delegacionit shqiptar mori pjesë në Sesionin e 50-të të Kongresit të Autoriteteve Lokale dhe Rajonale të Këshillit të Evropës, që po zhvillohet në Strasbourg.
Në këtë sesion historik, delegacioni shqiptar, përfshirë Z. Pjerin Ndreu dhe sekretaren e delegacionit Znj. Adelina Farrici, po kontribuon në diskutime të rëndësishme mbi sfidat dhe mundësitë për qeverisjen lokale dhe rajonale në Evropë. Temat kryesore të trajtuara përfshijnë:
• Zgjedhjet e lira në nivel lokal dhe rajonal
• Dhunën ndaj të zgjedhurve vendorë dhe mbrojtjen e mandatit të tyre
• Forcimin e kapaciteteve të pushtetit vendor në përdorimin e inteligjencës artificiale
• Të drejtat sociale në nivel lokal dhe rajonal
• Rolin e pushtetit vendor në përballimin e sfidave ndërkombëtare dhe ndikimet rajonale
• Mbështetjen për Ukrainën dhe rindërtimin në nivel lokal
• Zbatimin e të drejtave të njeriut nga autoritetet vendore
Pjesëmarrja në këtë Kongres i jep mundësi delegacionit shqiptar të ndajë përvojat e vendit tonë, të ndikojë në zhvillimin e politikave evropiane për qeverisjen vendore dhe të forcojë prezencën e Shqipërisë në arenën ndërkombëtare.
Gjatë qëndrimit në Strasbourg, delegacioni pati gjithashtu takime me Ambasadorin shqiptar, Z. Dastid Koreshi, si dhe me Z. Lulzim Hiseni, Konsull i Përgjithshëm i Kosovës, duke forcuar lidhjet dhe bashkëpunimin rajonal.
Zj. Urupi dhe delegacioni shqiptar do të vazhdojnë të marrin pjesë në sesionet dhe diskutimet e radhës, duke kontribuar drejt zhvillimit të demokracisë lokale dhe forcimit të kapaciteteve të autoriteteve vendore në Shqipëri dhe më gjerë.
