Kryeministri Edi Rama ka marrë në shënjestër këtë herë Ksamilin, të cilin e quajti “plazhi më i dhunuar” në vend, duke e cilësuar si një territor të kthyer në pre të injorancës dhe abuzimeve. Sipas tij, ky destinacion turistik i njohur është shndërruar në simbol të menaxhimit të keq, ku turistët shpesh trajtohen si skllevër, mes çmimeve të kripura dhe mungesës së standardeve.
“Nuk mund të jetë më pre e injorantëve që e shohin si tokë për t’u pushtuar dhe më pas për të sjellë turistët si skllevër, me çadra të çmuara që të hapen në kokë ose me çmime që dëmtojnë imazhin e turizmit shqiptar. Duhet të shërojmë plazhet e dhunuara, t’ua heqim nga duart privatëve. Nuk ka më arsye që Ksamili të jetë plazh privat, i lidhur me çmime marramendëse”, tha Rama.
Shefi i qeverisë nuk u ndal vetëm te Ksamili. Ai solli në vëmendje edhe Dhërmiun, ku sipas tij, ende ka subjekte që sjellin zhurmë, çmime të larta dhe derdhin ujërat e zeza në det. Ndërkohë, ai përmendi shembullin pozitiv të Himarës, ku bashkia ka ofruar një model të qartë me çadrat e loguara dhe shërbimin e pastër, pa salltanete e pa stres.
Rama u ndal edhe tek çmimet e ekzagjeruara, duke thënë se “nuk mund të vendosësh çmime marramendëse për një shezlong vetëm sepse ndodhesh në Ksamil, kur nuk ke asnjë kontribut për cilësinë e detit apo bukurinë e natyrës. Jo të ofrosh shezlong ku rrezikon të të penetrojë gozhda e ndryshkur”.
Kryeministri solli si shembull pozitiv edhe bashkinë e Lezhës, e cila sipas tij ka dyfishuar forcat e pastrimit dhe ka dhënë një model se si mund të menaxhohen plazhet me standarde më të larta. “Plazhi duhet të jetë në dispozicion të qytetarëve, jo të uzurpatorëve”, u shpreh Rama, duke theksuar se bashkitë duhet të garantojnë shërbime edhe në hapësirat publike, jo vetëm rërë të lirë.
