Kroçera prestigjioze “Voyager of the Seas”, me 3,626 pasagjerë, mbërriti për herë të parë në Portin e Sarandës, duke shënuar një moment të rëndësishëm për turizmin detar në qytet.
Zëvendëskryeministrja dhe ministrja e Infrastrukturës dhe Energjisë, Belinda Balluku, përmes një postimi në rrjetet sociale u shpreh se turistët e mbërritur përmes kësaj kroçere janë përpunuar nga porti i Sarandës, i cili në 8 muajt e parë të këtij viti ka regjistruar një rritje prej 21% të numrit të pasagjerëve, krahasuar me të njëjtën periudhë të vitit të kaluar.
“Kroçera ‘Voyager of the Seas’ i shtohet listës prej 70 kroçerash të planifikuara për sezonin aktual në Sarandë”, deklaroi Balluku.
Kroçera, me flamur Bahamas, mbërriti dje në portin e qytetit dhe solli turistë nga vende të ndryshme si Australia, Shtetet e Bashkuara dhe Kanadaja, të moshave të ndryshme. Turistët u ndanë në grupe sipas destinacioneve të zgjedhura, duke vizituar vende si Butrinti, Kalaja e Lëkurësit, Syri i Kaltër, Gjirokastra dhe Përmeti.
Gjatë këtij viti, Porti Detar, Komisariati i Policisë Kufitare, Kapiteneria dhe Dogana e Sarandës kanë marrë të gjitha masat e nevojshme për të siguruar mbarëvajtjen e sezonit turistik, i cili vijon edhe gjatë vjeshtës me ardhjen e turistëve të shumtë.
