Kolegji i Posaçëm i Apelimit (KPA) ka vendosur të rikthejë në detyrë prokuroren e Elbasanit, Pranvera Stafa, e cila ishte shkarkuar nga Komisioni i Pavarur i Kualifikimit (KPK) në mars të vitit 2024.
Vendimi u mor nga trupi gjykues i KPA-së, i përbërë nga Rezarta Schuetz (kryesuese), Ina Rama (relatore), si dhe Albana Shtylla, Natasha Mulaj dhe Sokol Çomo (anëtarë).
Pas shqyrtimit të çështjes në dhomë këshillimi, Kolegji vendosi ndryshimin e vendimit të datës 8 mars 2024 të KPK-së dhe konfirmimin në detyrë të Pranvera Stafës.
Prokurorja Stafa ka një karrierë të gjatë në sistemin e drejtësisë, të cilën e nisi në vitin 1989, dhe ka shërbyer për më shumë se dy dekada pranë Prokurorisë së Elbasanit.
Vendimi i KPA-së është përfundimtar dhe i formës së prerë, duke i dhënë fund procesit të rivlerësimit për këtë rast.
