Kryetari i Partisë Demokratike, Sali Berisha, doli sot në një konferencë për mediat, ku reagoi pas vendimit të Gjykatës Kushtetuese për pezullimin e dekretit të presidentit Bajram Begaj që përcaktonte zhvillimin e zgjedhjeve për Bashkinë e Tiranës më 9 nëntor.
I pyetur nëse Partia Demokratike është e përgatitur të marrë pjesë në garë në rast se procesi do të vijojë, Berisha deklaroi se opozita do të respektojë në çdo hap vendimin e Gjykatës Kushtetuese, duke e cilësuar ndërkohë “të shëmtuar dhe të papërgjegjshëm” veprimin e presidentit.
“Pasi mori një goditje fatale nga vendimi i Gjykatës Kushtetuese, Edi Rama njoftoi se do të vazhdojë në rrugën e Xhaçkës, do bëjë atë që bëri me Xhaçkën. Por i garantoj qytetarët e Tiranës se, duke respektuar plotësisht vendimin e Gjykatës Kushtetuese dhe duke dënuar me forcën më të madhe aktin e shëmtuar të presidentit kukull të Edi Ramës, asgjë nuk do të mund të nxirret jashtë kuadrit kushtetues,” – u shpreh Berisha.
Ai theksoi se Partia Demokratike mbetet e vendosur të mbrojë ligjshmërinë dhe të garantojë që çdo proces zgjedhor të zhvillohet në përputhje me Kushtetutën dhe parimet demokratike.