Ish-mbrojtësi i Kombëtares, Ervin Fakaj, nuk kursen fjalët e tij për futbollistët e ekipit shqiptar pas paraqitjes së dobët ndaj Gjibraltarit. Sipas tij, lojtarët nuk kanë vlerësuar as ndeshjen dhe as fanellën që mbanin veshur.
“Nuk është me buton që sot të mos luash dhe pas katër ditësh të luash. Mund të kritikojmë kë të duam, nga trajneri te stafi dhe federata, por përgjegjësit kryesorë sot janë lojtarët. Nuk mund të veshësh fanellën e Kombëtares dhe të dalësh me një paraqitje të tillë. Është e pajustifikueshme,” tha Fakaj për SuperSport.
Ai shtoi se pavarësisht vështirësive, çdo lojtar duhet të respektojë kundërshtarin dhe fanellën që përfaqëson, duke theksuar se respekti nuk varet nga emri apo madhësia e kundërshtarit: “Çdo kundërshtar merr respektin e duhur, nuk ka rëndësi nëse është Anglia, Serbia apo Gjibraltari.”