PRRENJAS ,21 korrik 2026/Albania Express News/-Ish-kryetari i këshillit bashkiak të Bashkisë Prrenjas, Myslim Karriqi, ka reaguar ashpër ndaj diskutimeve për një reformë të re territoriale, duke kundërshtuar me argumenta tejet bindëse çdo skenar që parashikon shkrirjen e Bashkisë së Prrenjasit dhe bashkimin e saj me Bashkinë Librazhd.
Në një reagim publik, Karriqi akuzon drejtuesit politikë dhe vendorë se po rrezikojnë ekzistencën e Prrenjasit si njësi vendore, duke theksuar se bashkia nuk duhej të ishte pjesë e diskutimeve për riorganizimin territorial.
Sipas tij, shpopullimi i zonës dhe vështirësitë ekonomike janë pasojë e politikave të ndjekura ndër vite. Ai shprehet se banorët janë detyruar të largohen nga fshatrat drejt qytetit ose jashtë vendit, ndërsa shërbimet publike janë reduktuar vazhdimisht.
Karriqi argumenton se, sipas të dhënave të Censusit, Bashkia e Prrenjasit ka 20.011 banorë rezidentë dhe renditet e 31-ta nga 61 bashkitë e vendit, duke theksuar se plotëson kriteret minimale të Bashkimit Evropian për funksionimin e një njësie të qeverisjes vendore.
Në reagimin e tij ai sjell edhe një listë të bashkive me numër më të ulët banorësh se Prrenjasi, duke ngritur pyetjen pse reforma po diskutohet fillimisht për këtë bashki dhe jo për njësi të tjera me popullsi dukshëm më të vogël.
Ish-kryekëshilltari kritikon gjithashtu largimin e disa shërbimeve nga Prrenjasi drejt Librazhdit, duke përmendur shërbimin spitalor, zyrat administrative dhe burime të tjera, ndërsa paralajmëron se shkrirja e bashkisë do t’i detyrojë qytetarët të udhëtojnë më larg për të marrë shërbimet bazë, duke rritur kostot dhe kohën e pritjes.
Si alternativë, Karriqi propozon që në rast të një reforme territoriale të merren në konsideratë lidhjet historike, kulturore, pozicioni gjeografik dhe nevojat reale të banorëve. Ai sugjeron që zona e Mokrës së Poshtme të lidhet administrativisht me Prrenjasin, me argumentin se banorët e saj i marrin prej vitesh shërbimet kryesore në këtë qytet.
Në reagimin e tij, Karriqi thekson se të dhënat zyrtare të Censit tregojnë se Bashkia e Prrenjasit numëron rreth 20 mijë banorë rezidentë, çka e rendit në mesin e bashkive me popullsi mesatare në Shqipëri dhe jo ndër njësitë më të vogla që mund të konsideroheshin për bashkim administrativ. Ai argumenton se në vend funksionojnë një sërë bashkish me popullsi dukshëm më të ulët, disa prej tyre edhe nën 10 mijë banorë, ndërsa Prrenjasi vazhdon të ketë një territor të gjerë, katër njësi administrative dhe një pozicion strategjik në Korridorin VIII, duke shërbyer si nyje lidhëse mes Elbasanit, Librazhdit, Pogradecit dhe pikës kufitare të Qafë Thanës. 
Sipas ish-kryekëshilltarit, çdo riorganizim territorial duhet të mbështetet në tregues objektivë si numri i popullsisë, shtrirja territoriale, largësia gjeografike dhe aksesueshmëria e shërbimeve publike. Ai paralajmëron se shkrirja e Bashkisë së Prrenjasit do të sillte largimin edhe të shërbimeve të mbetura, duke detyruar qytetarët të udhëtojnë drejt Librazhdit për procedura administrative, shëndetësore dhe sociale, gjë që sipas tij do të rriste kostot dhe do të përkeqësonte më tej cilësinë e shërbimeve.
Karriqi nënvizon gjithashtu se Prrenjasi ka humbur një pjesë të konsiderueshme të popullsisë gjatë viteve të fundit për shkak të emigracionit dhe lëvizjeve demografike, por kjo, sipas tij, nuk duhet të përdoret si argument për heqjen e statusit të bashkisë. Përkundrazi, ai kërkon politika zhvillimore që të ndalin shpopullimin dhe të forcojnë rolin administrativ e ekonomik të zonës, në vend që ai të dobësohet më tej.
Në përfundim të reagimit të tij, Myslim Karriqi bën thirrje që Bashkia e Prrenjasit të mos preket nga reforma territoriale, duke e mbyllur mesazhin me apelin: “Larg duart nga Prrenjasi.”