Një atmosferë gëzimi dhe përkushtimi shpirtëror mbizotëroi këtë fundjavë në qytetin e Librazhdit, ku u inaugurua xhamia e re e qytetit, një vepër që pritet të kthehet në simbol të paqes, unitetit dhe besimit për gjithë komunitetin mysliman të zonës.
Në këtë ceremoni të rëndësishme morën pjesë Kryetari i Bashkisë Librazhd, Mariglen Disha; Ambasadori i Shtetit të Katarit në Shqipëri, Shkëlqesia e tij z. Jabr Bin Ali Al Dossari; Prof. Dr. Ali Kuradagu, Kryetar i Unionit Ndërkombëtar të Dijetarëve Myslimanë; si dhe përfaqësues të lartë të organizatës humanitare Qatar Charity, mes tyre z. Ahmad Yousef Fakhroo, Zëvendës CEO, dhe z. Mahmoud Shaker, Drejtor i Qatar Charity Albania.
Në fjalën e tij përshëndetëse, Kryetari Mariglen Disha shprehu mirënjohje për mbështetjen e madhe të Ambasadës së Shtetit të Katarit dhe të organizatës Qatar Charity, që bënë të mundur ndërtimin e kësaj xhamie moderne, duke e cilësuar atë si “një dhuratë të çmuar për komunitetin e Librazhdit”.
“Kjo xhami nuk është vetëm një objekt kulti, por një vend që bashkon njerëzit, forcon vlerat shpirtërore dhe promovon harmoninë në qytetin tonë,” u shpreh Disha.
Edhe përfaqësuesit e Katarit vlerësuan bashkëpunimin e ngushtë me autoritetet vendore dhe theksuan rëndësinë e projekteve të tilla, që sjellin dobi të drejtpërdrejtë për komunitetet lokale, duke forcuar lidhjet miqësore mes Shqipërisë dhe Katarit.
Xhamia e re e Librazhdit do të shërbejë si një qendër e rëndësishme fetare dhe komunitare, ku besimtarët do të kenë mundësinë të gjejnë paqe shpirtërore, frymëzim dhe bashkim rreth vlerave të përbashkëta të fesë dhe respektit ndërmjet njerëzve.
