Media prestigjioze BBC i ka kushtuar një artikull traditave kulinare shqiptare dhe mënyrës sesi ato janë ruajtur ndër vite.
Kryeministri Edi Rama ndau në rrjetet sociale artikullin duke theksuar se rrjeti i njohur mediatik BBC i ka kushtuar një artikull agroturizmit dhe kulinarisë shqiptare, përmes seksionit BBC Travel.
“Në artikull veçohen recetat tradicionale të gjysheve shqiptare që po trashëgohen brez pas brezi dhe që janë një pikë e fortë e sipërmarrjeve të reja të agroturizmit të hapura në vendin tonë”, theksoi Rama.
BBC sjell në vëmendje mungesën e ushqimeve gjatë regjimit komunist, zhdukjen e recetave në atë kohë, si dhe ndikimin e eksodit të shqiptarëve pas viteve ’90.
BBC shkruan se “Shqipëria po kthehet te rrënjët e saj të kuzhinës me ndihmën e gjysheve kuzhiniere, që u mësojnë brezave të tërë se si të gatuajnë pjata antike”.
“Kjo për shkak se vendi ballkanik ka vuajtur jo një, por dy periudha amnezie kulinare gjatë 80 viteve të fundit. Së pari, nga viti 1946 deri në vitin 1991, Shqipëria u sundua nga komunistë të vijës së ashpër, të cilët në fakt e izoluan vendin e vogël malor nga bota e jashtme. Gjatë kësaj periudhe, librat e gatimit u dogjën, importet u ndaluan, udhëtimet jashtë vendit u ndaluan, ushqimi u kolektivizua dhe mungesat ishin të shumta”, shkruan BBC.
“Pastaj, pas rënies së komunizmit në vitet 1990, 710 000 qytetarë – 20% e popullsisë – ikën nga Shqipëria nga viti 1989 deri në vitin 2001 në kërkim të punës në vende të tjera. Me kalimin e kohës, shumë prej këtyre emigrantëve harruan recetat e atdheut të tyre ndërsa u përshtatën me vende dhe kultura të reja. Midis mungesave të përhapura të ushqimit gjatë komunizmit dhe emigrimit pasues pas tij, shumë shqiptarë brenda dhe jashtë vendit kishin harruar se si të përgatitnin kuzhinën tradicionale shqiptare në fillim të shekullit XXI – përveç grave të një moshe të caktuar”, përfundon BBC.