Dy ditë pas riemërimit si kryeministër, Sébastien Lecornu ka prezantuar kabinetin e ri qeveritar të Francës. Lista e publikuar nga Pallati Élysée përfshin 34 anëtarë, mes të cilëve disa emra të rinj dhe pak të njohur për publikun.
Në postet kryesore nuk ka pasur ndryshime të mëdha: Jean-Noël Barrot mbetet ministër i Jashtëm, Roland Lescure vazhdon si ministër i Ekonomisë dhe Financave, Rachida Dati si ministre e Kulturës dhe Gérald Darmanin në drejtësi. Lescure konsiderohet një nga aleatët më të ngushtë të presidentit Emmanuel Macron.
Ndryshime ka pasur në disa ministri të tjera kyçe. Ish-ministrja e Punës dhe Shëndetësisë, Catherine Vautrin, do të drejtojë tani Ministrinë e Mbrojtjes. Ministri i ri i Brendshëm është prefekti i policisë së Parisit, Laurent Nuñez, i cili zëvendëson konservatorin Bruno Retailleau. Ndërkohë, në krye të Ministrisë së Punës është emëruar drejtori i përgjithshëm i hekurudhës shtetërore SNCF, Jean-Pierre Farandou. Ministria e Mjedisit do të drejtohet nga ish-drejtuesja e WWF France, Monique Barbut.
Sfida kryesore: Buxheti i vitit 2026
Para prezantimit të kabinetit, Lecornu zhvilloi një takim konsultues me presidentin Macron në Pallatin Élysée. Sipas zëdhënësit të presidencës, qeveria duhet të dorëzojë buxhetin për vitin 2026 deri më 15 tetor, për të respektuar afatin kushtetues.
Kryeministri i ri përballet me presion të madh për uljen e deficitit buxhetor të Francës. Konservatorët kërkojnë shkurtime të forta të shpenzimeve, ndërsa liberalët e majtë po insistojnë për një taksë ndaj miliarderëve dhe pezullimin e reformës së diskutueshme të pensioneve që u ndërmor nga Macron. Lecornu nuk e ka përjashtuar mundësinë e një tjetër dorëheqjeje në rast se buxheti nuk arrin të miratohet.
Kabineti i tij i mëparshëm u rrëzua brenda më pak se 14 orësh, para se Macron ta rikonfirmonte në detyrë më 10 tetor.
