Pak ditë pas njoftimit nga DHL se Komisioni Qëndror i Zgjedhjeve nuk kishte paguar për shërbimin që mundësoi votën e diasporës, ka ardhur edhe përgjigja e kryekomisionerit Ilirjan Celibashi.
Në shkresën e siguruar nga gazetarja e Top Channel, Elda Menga, Celibashi i kërkon kompanisë postare të tërheqë “presionin” për kamatëvonesat dhe të caktojë një person përgjegjës për përmbushjen e detyrimeve kontraktore.
Kryekomisioneri sqaron se fakti që DHL ka dërguar faturat në KQZ dhe ato janë regjistruar në sistem nuk e detyron automatikisht institucionin që të bëjë pagesën, dhe as të paguajë kamatëvonesa.
“Sikurse në çdo kontratë tjetër, shërbimi i marrë përsipër nga DHL duhet të provohet se është kryer në sasi, cilësi dhe kohë. Pranimi i shërbimit nga KQZ është ai që detyron institucionin për pagesën,” shprehet Celibashi.
Lajmi vjen ndërsa fatura e DHL mbetet ende në pritje, duke theksuar rëndësinë e verifikimit të kryerjes së shërbimit para çdo pagesë.