Kryeministri Edi Rama ka vendosur datën 11 shtator, ora 10:00 në Tiranë, për të prezantuar emrat e ministrave të rinj të kabinetit të tij të katërt. Ky prezantim vjen një ditë pas seancës së parë të Parlamentit, duke shënuar një ndryshim në traditën e shpalljes së qeverisë gjatë 12 viteve të fundit, kur fundi i gushtit ka qenë zakonisht periudha e njohjes me kabinetin e ri nga Asambleja Socialiste.
Kabineti Rama 4 do të bëhet i ditur një ditë pas betimit të deputetëve të rinj, dalë nga zgjedhjet e 11 majit. Ende nuk dihet nëse ministrat aktualë do të qëndrojnë në detyrë, por duket se Rama ka ndërtuar skuadrën e re mbi dy parime kryesore. Së pari, ai do të ulë në tryezën e Këshillit të Ministrave ministra me profil të lartë teknik, në shërbim të mbylljes së kapitujve të hapur të anëtarësimit në BE. Së dyti, Rama ka kujdesur që të ketë në skuadër ministra me sa më pak përballje të mundshme me SPAK gjatë katër viteve të ardhshme.
Gjatë mbledhjes së Asamblesë Socialiste të 11 shtatorit, pritet gjithashtu të bëhet e ditur se kujt do t’i besojë postet e zëvendëskryeministrit, kryetarit të Parlamentit dhe kreut të Grupit Parlamentar.
Përveç emrave të ministrave të rinj, pritet edhe riformatimi i disa ministrive, të cilat me strukturën aktuale përfshijnë shumë dikastere.