Prej një dekade, Elbasani ka qenë nikoqir i përvitshëm i Festivalit Kombëtar të Koncerteve dhe Muzikës së Dhomës, një ngjarje e rëndësishme për promovimin e muzikës klasike dhe të dhomës në Shqipëri. Në edicionin e 10-të, festivali ka regjistruar një rritje të pjesëmarrjes, me 15 trupa orkestrale nga Shqipëria dhe Mali i Zi, më shumë se çdo vit tjetër.
Repertori i festivalit përfshin muzikë klasike shqiptare dhe ndërkombëtare, ndërsa një vëmendje e veçantë i kushtohet krijimeve të reja të kompozitorëve shqiptarë, duke ofruar një platformë për shfaqjen e talentit dhe inovacionit në muzikën e dhomës.
Sipas maestro Blerim Narazanit, drejtues artistik i festivalit, ngjarja ka një dimension edukativ dhe kulturor të rëndësishëm. Ai thekson se festivali duhet të shërbejë si motiv për shkollat artistike në qytetet e tjera, që t’u japin më shumë rëndësi përgatitjes së brezave të rinj të instrumentistëve, duke u përballur me një rënie të numrit të nxënësve në fushën e artit muzikor.
“Ky festival synon të promovojë muzikën e dhomës, të nxjerrë në pah talentet e reja dhe të krijojë ura bashkëpunimi mes institucioneve të artit dhe shkollave të muzikës në vend,” tha Narazani, duke theksuar se pjesëmarrja e trupa orkestrale dhe diversiteti i repertorit e bëjnë këtë festival një ngjarje që nuk duhet humbur.
Festivali nuk është thjesht një spektakël muzikor, por edhe një mundësi për rritjen e ndërgjegjësimit të publikut ndaj muzikës klasike dhe të dhomës, duke kontribuar në ruajtjen e trashëgimisë kulturore dhe nxitjen e bashkëpunimeve ndërinstitucionale mes artistëve dhe shkollave të muzikës.