Reshjet e shiut që kanë përfshirë vendin gjatë orëve të natës kanë kaluar pa shkaktuar probleme në qarkun e Elbasanit. Burime nga strukturat e Emergjencave Civile në të gjitha bashkitë e qarkut bëjnë me dije se situata është e qetë për momentin dhe nën kontroll .Nda asnjë nga shtatë bashkitë e këtij Qarku deri tani nuk janë raportuar shqetësime apo ngjarje që të kërkojnë ndërhyrje emergjente.
Sipas raportimeve zyrtare, reshjet kanë qenë me intensitet të ulët dhe nuk kanë krijuar rrezik për përmbytje apo dëmtime infrastrukturore. Të gjitha akset rrugore, si ato nacionale ashtu edhe rrugët rurale, janë të hapura dhe qarkullimi vijon normalisht, pa pengesa dhe pa rrezik për drejtuesit e mjeteve.
Autoritetet lokale dhe grupet e gatishmërisë vijojnë monitorimin e situatës meteorologjike, ndërsa apelojnë për kujdes të shtuar në zonat malore ku lagështia mund të krijojë rrëshqitje të lehta.
Për momentin, qarku i Elbasanit mbetet një nga zonat ku reshjet nuk kanë sjellë pasoja, ndërsa strukturat përgjegjëse mbeten në gatishmëri në rast të ndryshimeve të motit.