Policia australiane është në kërkim të një personi të armatosur që vrau dy oficerë policie dhe plagosi një tjetër, ndërsa ata po përpiqeshin të ekzekutonin një urdhër arresti për akuza për sulm seksual në një zonë rurale të shtetit të Viktorias.
Incidenti ndodhi në qytetin malor të Porepanka, rreth 300 kilometra në verilindje të Melburnit. Policia e Viktorias njoftoi në rrjetet sociale se po hetonte një situatë ende aktive dhe u bëri thirrje banorëve të shmangin zonën.
Komisioneri i Policisë Federale Australiane, Reece Kershaw, shprehu shqetësim të thellë për oficerët e përfshirë. Kryetarja e bashkisë, Sarah Nicholas, e cilësoi ditën si “pikëllimi dhe tronditjeje të thellë” dhe i shprehu ngushëllimet familjeve dhe kolegëve të viktimave. Ajo njoftoi gjithashtu se objektet publike, përfshirë bibliotekat, qendrat e informacionit dhe depot, do të mbeten të mbyllura deri në një njoftim të dytë.
Drejtori i shkollës fillore të Porepankës, Jean Gillies, deklaroi për ABC Melbourne se rreth 90 nxënës u mbyllën brenda ambienteve të shkollës që nga ora 11:30 sipas kohës lokale për shkak të gjendjes së jashtëzakonshme. Gjithashtu, aeroporti lokal është mbyllur për arsye sigurie. Ende nuk ka të dhëna nëse bllokimi i shkollës është hequr.
