Deputetja e Partisë Socialiste, Aulona Bylykbashi, ishte e pranishme në koncertin “E jona Shqipëria”, organizuar nga nxënësit e Shkollës Artistike “Onufri” në Teatrin “Skampa”, ku të rinjtë sollën një pasdite të mbushur me emocione, talent dhe dashuri për atdheun.
Bylykbashi vlerësoi lart punën e nxënësve dhe mësuesve, duke theksuar se rinia dhe arti janë pasuria më e madhe e Elbasanit, ajo nënvizoi se këto aktivitete tregojnë se sa e gjallë dhe krijuese është rinia e qytetit, e cila di të ruajë dhe të promovojë vlerat kombëtare përmes muzikës, pikturës dhe performancës skenike.
Në prag të festave të Nëntorit dhe në atmosferën e Pavarësisë, deputetja u ndal edhe te rëndësia e këtyre datave historike për brezin e ri, duke theksuar se liria dhe shteti shqiptar janë ndërtuar mbi sakrificat e paraardhësve, ndërsa sot është detyrë e të rinjve t’i mbushin me përmbajtje këto vlera përmes dijes, punës dhe krijimtarisë.
Bylykbashi shprehu mirënjohje për Shkollën Artistike “Onufri” si një vatër e rëndësishme e edukimit përmes artit në Elbasan, duke theksuar se të rinjtë që zgjedhin rrugën e artit i japin qytetit identitet, dinjitet dhe një imazh modern, të hapur dhe europian.
Ajo theksoi se do të vazhdojë të mbështesë iniciativat kulturore dhe rinore në qytet, duke i cilësuar këto aktivitete si një urë lidhëse mes traditës, historisë së Pavarësisë dhe aspiratave të brezit të ri për një Shqipëri më të drejtë, më të zhvilluar dhe më gjithëpërfshirëse.
