Deputeti i Partisë Socialiste, Erjon Braçe, ka bërë një denoncim të fortë publik mbi përhapjen e një skeme piramidale që, sipas tij, po shtrihet me shpejtësi në zonat e Divjakës dhe Lushnjës.
Përmes një postimi në rrjetet sociale, Braçe deklaron se prej dy muajsh është në dijeni të kësaj skeme, të quajtur TXEX, e cila funksionon online dhe përmes telefonave celularë. Ai shpjegon se është kontaktuar fillimisht nga një sipërmarrës vendas, i shqetësuar nga përhapja e fenomenit në komunitet.
Deputeti bën thirrje të fortë për qytetarët që janë përfshirë në këtë skemë: “Dilni sa më shpejt nga kjo piramidë dhe denonconi pranë policisë së shtetit. Dorëzoni atje telefonin tuaj që hetuesit të kenë mundësi të ndjekin përgjegjësit përmes rrjedhës së parave”, shkruan Braçe.
Sipas tij, vetëm në Divjakë mund të jenë përfshirë mbi 1,000 persona, një shifër alarmante për një zonë me popullsi të vogël. Braçe thekson se situata është “e tmerrshme” dhe përhapja e mëtejshme në Lushnje përbën një kërcënim serioz për komunitetin.
