Gjykata e Shkallës së Parë të Juridiksionit të Përgjithshëm Elbasan ka njoftuar se për periudhën 20–24 tetor 2025 kishte planifikuar zhvillimin e rreth 330 seancave gjyqësore.
Megjithatë, për shkak të bojkotit të shpallur nga Dhoma Kombëtare e Avokatisë së Shqipërisë, i cili vijon në të gjitha gjykatat e vendit, Gjykata e Elbasanit ka respektuar vendimin e këtij institucioni duke shtyrë të gjitha seancat ku palët janë të përfaqësuara nga avokatët e tyre mbrojtës.
Në këtë periudhë, po zhvillohet vetëm një numër i kufizuar seancash, kryesisht ato ku prania e përfaqësuesve ligjorë nuk është e detyrueshme, ose që lidhen me masa sigurie, çështje emergjente apo administrative, për të garantuar funksionimin minimal të drejtësisë.
Gjykata thekson se në përfundim të bojkotit, do të hartohet një kalendar i ri për zhvillimin e seancave të shtyra, në mënyrë që proceset të mos pësojnë vonesa të tejzgjatura dhe të sigurohet e drejta e çdo pale për një gjykim të rregullt brenda afateve ligjore.
