Beteja për Majkëll Olise ka nisur, teksa klubet kryesore të Premier Ligë duan ta rikthejnë mesfushorin e Bajernit në Angli. Kampionët rekord gjerman po punojnë tashmë për një kontratë të re me Olise, për të zmbrapsur përfundimisht “sulmin” shumë milionësh. Kontrata aktuale e lojtarit zgjat deri në verën e vitit 2029.
Një faktor vendimtar për Bajernin në këtë garë është fakti se, ndryshe nga te Kristal Palas më parë, kontrata e Olise nuk përmban klauzolë largimi. Me një pagë bazë vjetore prej 12 milionë eurosh, francezi ende nuk është ndër më të paguarit e klubit, por me bonuse mund të arrijë deri në 16 milionë euro. Për krahasim, Herri Kejn, i cili gjithashtu është në shënjestrën e klubeve angleze, mund të fitojë deri në 24 milionë euro në vit, gjë që i jep Bajernit një hapësirë manovrimi në negociatat e ardhshme.
Sipas SPORT BILD, drejtuesit e klubit planifikojnë të sigurojnë shërbimet e Olise afatgjatë, me një rritje page dhe një kontratë të re që do të zgjasë deri në vitin 2031. Drejtori sportiv Maks Eberl thotë: “Edhe në sezonin e tij të parë, Majkëll ka lënë shumë përshtypje. Është një lojtar për të cilin tifozët vijnë në stadium; është kënaqësi ta shohësh të luajë futboll. Ai ka ende mbi tre vjet e gjysmë kontratë, do të bëhet gjithnjë e më shumë faktor vendimtar në lojën e Bajernit dhe do të formësojë të ardhmen e këtij ekipi – sa më gjatë të qëndrojë, aq më mirë.”
Presidenti Herbert Hainer shton: “Majkëll Olise ishte një figurë relativisht e panjohur vetëm pak më shumë se një vit më parë – sot, e gjithë bota e njeh. Firmosja me të është provuar si një goditje e vërtetë, dhe ai ka bërë hapin në ligën ndërkombëtare të elitës me Bajernin brenda një kohe shumë të shkurtër. Ai është fytyra e Bajernit të ri, dhe shpresojmë të mbetet i tillë për një kohë të gjatë.”