Nga Fatmir Popja
Edhe pse vera po i afrohet fundit, Bashkia e Belshit vijon të tërheqë turistë të huaj që zgjedhin të zbulojnë bukuritë natyrore, trashëgiminë kulturore dhe mikpritjen tradicionale që ofron kjo zonë e veçantë e Shqipërisë së Mesme.
Paraditen e sotme, një grup turistësh nga Izraeli dhe një tjetër nga Belgjika mbërritën në qytetin e Belshit duke e nisur vizitën e tyre me një shëtitje në pedonalen e qytetit, një hapësirë urbane që gjithnjë e më shumë po kthehet në pikë referimi për turistët vendas dhe të huaj.
Të shoqëruar nga guida vendase, vizitorët u njohën me historinë e qytetit, zhvillimin e tij të fundit urban, si dhe rëndësinë që Belshi ka marrë në hartën turistike të Shqipërisë, veçanërisht përmes promovimit të rajonit të Dumresë, një zonë me vlera të jashtëzakonshme natyrore dhe kulturore.
Turistët shprehën entuziazëm për atmosferën e qetë dhe të pastër që ofron qyteti, për mikpritjen e banorëve lokalë dhe për veçantinë e natyrës përreth.
Më pas, grupet turistike u nisën drejt destinacioneve më të rëndësishme të Dumresë, duke përfshirë liqenet karstike, peizazhe unike që formojnë një mozaik natyror spektakolar dhe që janë ende pak të njohura për publikun e gjerë, por me potencial të madh për zhvillimin e turizmit të qëndrueshëm.
Vizita do të përfshijë gjithashtu ndalesa në pika me interes historik e kulturor të zonës, si dhe degustimin e produkteve lokale të kulinarisë tradicionale, një tjetër pasuri që e bën Dumrenë të veçantë në llojshmërinë e saj gastronomike.
Zhvillimi i turizmit në Belsh dhe Dumre është një shembull i qartë i mënyrës se si investimi në infrastrukturë, promovimi inteligjent dhe ruajtja e vlerave lokale mund të sjellin një model të qëndrueshëm zhvillimi për bashkitë e vogla në Shqipëri.
Ky nuk është një rast i izoluar.Fluksi i turistëve në Belsh është rritur ndjeshëm gjatë viteve të fundit, duke e kthyer zonën në një destinacion gjithnjë e më të kërkuar nga vizitorët që kërkojnë përvoja autentike, larg turizmit masiv dhe afër natyrës.
Autoritetet vendore kanë shprehur angazhimin për të vijuar me përmirësimin e ofertës turistike, duke ndërtuar bashkëpunime me operatorët turistikë vendas dhe të huaj, me synimin për ta vendosur Belshin dhe Dumrenë në një vend qendror në hartën e turizmit natyror dhe kulturor të Shqipërisë.
