Presidenti i SHBA-së, Donald Trump, nuk e ka përjashtuar mundësinë e kandidimit për një mandat të tretë për Shtëpinë e Bardhë, duke thënë se do të donte shumë te rikandidonte, sipas BBC.
Por, Trump e hodhi poshtë mundësinë e kandidimit për zëvendëspresident në vitin 2028 – një ide e hedhur nga disa mbështetës si një mënyrë që ai të anashkalonte kushtetutën e SHBA-së që i ndalon presidentit të kandidojë për një mandat të tretë.
Duke folur me gazetarët gjatë udhëtimit të tij në Azi, Trump e përshkroi idenë si “shumë të lezetshme” dhe tha se “nuk do të ishte e drejtë”.
Nuk është e qartë se çfarë metode do të përdorte për të kandiduar sërish. Javën e kaluar, ish-strategu i Trump, Steve Bannon, tha se ekzistonte një “plan” për t’i siguruar presidentit 79-vjeçar një mandat tjetër.
“Nuk e kam menduar vërtet. Por, kam shifrat më të mira në sondazhe që kam pasur ndonjëherë”, tha Trump duke folur për mundësinë e një mandati të tretë, në bordin e avionit presidencial “Air Force One” gjatë rrugës për në Japoni nga Malajzia.
Presidenti Trump sugjeroi zëvendëspresidentin JD Vance dhe sekretarin amerikan të Shtetit Marco Rubio si pasardhës të mundshëm, duke i quajtur ata “të pandalshëm”.
“Kemi një grup të shkëlqyer njerëzish”, tha ai duke iu referuar demokratëve.
A mund të shërbejë Trump në një mandat të tretë si president i SHBA-së?
Amendamenti i 22-të i kushtetutës amerikane i ndalon presidentët të kërkojnë një mandat të tretë.
Shfuqizimi i amendamentit do të kërkonte miratimin nga dy të tretat e Dhomës së Përfaqësuesve dhe Senatit, ose një konventë kushtetuese të thirrur nga dy të tretat e legjislaturave shtetërore – një proces që shihet si i pamundur.
Javën e kaluar, ish-këshilltari i Trump, Steve Bannon – i cili mbetet një mbështetës i zëshëm – pretendoi se kishte një “plan” për të siguruar një mandat të tretë për Trump.
“Trump do të jetë president në vitin 2028, dhe njerëzit duhet ta pranojnë këtë”, tha Bannon për “The Economist”.
“Në kohën e duhur, ne do të paraqesim se cili është plani”, shtoi ai.
Është ende e paqartë se cilët demokratë do të kandidojnë për Shtëpinë e Bardhë në vitin 2028, megjithëse disa prej tyre kanë shprehur tashmë interes.
Ish-nënkryetarja Kamala Harris, gjithashtu tha se mund të kandidonte sërish dhe se “ndoshta” mund të ishte presidente në të ardhmen.