Bashkia Elbasan ka marrë një vlerësim të rëndësishëm në Konferencën Kombëtare të organizuar nga Ministri i Shtetit për Pushtetin Vendor, ku u prezantuan rezultatet e Grantit të Bazuar në Performancë për vitin 2025. Në këtë aktivitet, që shërben si treguesi më i qartë i cilësisë së qeverisjes vendore, Elbasani u rendit ndër pesë bashkitë me performancën më të lartë në shkallë kombëtare, duke konfirmuar progresin dhe standardet e larta të punës së saj.
Veçanërisht, Bashkia Elbasan është një nga vetëm tre bashkitë në Shqipëri që ka arritur të përmbushë të gjashtë planet strategjike vendore të kërkuara nga skema e grantit, një kriter i vështirë që kërkon planifikim profesional, koordinim të ngushtë ndërsektorial dhe funksionim të konsoliduar institucional. Planet e përmbushura përfshijnë:
-
Planin e Mbetjeve
-
Planin Social
-
Planin e Arsimit Parauniversitar
-
Planin e Barazisë Gjinore
-
Planin e Integritetit
-
Planin e Mbarështimit të Pyjeve
Ky rezultat, i cilësuar ndër më të mirët në rang vendi, reflekton punën e përbashkët të ekipeve bashkiake, aplikimin e standardeve të larta të planifikimit dhe angazhimin për qeverisje transparente e efektive. Me këtë arritje, Bashkia Elbasan konfirmon edhe një herë pozicionin e saj si model i mirëadministrimit dhe zhvillimit të qëndrueshëm.
