Në ambientet e Bashkisë Elbasan, u zhvillua një takim i rëndësishëm mbi raportimin dhe monitorimin e angazhimeve të marra nga Bashkia në kuadër të Kontratës Sociale 2023–2027, e nënshkruar me organizatën partnere “Tjetër Vizion”. Ky takim synon të bëjë një vlerësim të detajuar të ecurisë së prioriteteve të përcaktuara, të evidentojë arritjet dhe sfidat, si dhe të diskutojë hapat e mëtejshëm për garantimin e transparencës dhe llogaridhënies ndaj qytetarëve.
Gjatë takimit, përfaqësuesit e Bashkisë dhe të organizatës partner diskutuan mbi rëndësinë e bashkëpunimit ndërinstitucional dhe të përfshirjes aktive të komunitetit në monitorimin e politikave lokale, të cilat ndikojnë drejtpërdrejt në jetën e përditshme të qytetarëve të Elbasanit. U theksua se ky proces nuk është thjesht formal, por një mënyrë e drejtpërdrejtë për të përmirësuar shërbimet lokale dhe për të garantuar që prioritetet e vendosura në kontratë të realizohen në mënyrë efektive.
Bashkia Elbasan vlerësoi bashkëpunimin me “Tjetër Vizion”, duke e konsideruar si një shembull të mirë praktik në implementimin e politikave transparente dhe llogaridhënëse. Ky takim gjithashtu shërbeu si një platformë për të identifikuar sfidat dhe për të diskutuar strategjitë e ardhshme, që synojnë përmirësimin e shërbimeve dhe angazhimin më të madh të qytetarëve në proceset vendimmarrëse lokale.
albaniaexpress.al
