Në ambientet e Bashkisë Elbasan u zhvillua mbledhja e Këshillit Vendor të Sigurisë Publike (KVSP), me pjesëmarrjen e institucioneve vendore, përfaqësuesve të drejtësisë, arsimit, shoqërisë civile dhe aktorëve të tjerë lokalë.
Kryetari i Bashkisë, Gledian Llatja, theksoi rëndësinë e sigurisë publike dhe perceptimit të qytetarëve për sigurinë si një nga shtyllat kryesore të jetës komunitare:
“Siguria publike nuk është vetëm një detyrë institucionale, por një vlerë shoqërore që përcakton mënyrën se si ne jetojmë, punojmë dhe i besojmë njëri-tjetrit. Qëllimi ynë është që çdo qytetar i Elbasanit jo vetëm të jetë i sigurt, por edhe të ndihet i tillë.”
Llatja prezantoi nismat e ndërmarra nga Bashkia për të rritur ndjenjën e sigurisë, duke përfshirë përmirësimin e ndriçimit dhe infrastrukturës urbane, instalimin e teknologjive të mençura për sigurinë, zhvillimin e programeve parandaluese për të rinjtë dhe adresimin e dhunës me bazë gjinore, si edhe bashkëpunimin me shkollat dhe komunitetet për fushata ndërgjegjësuese.
Takimi u organizua në kuadër të projektit “PARTNER”, pjesë e Programit SCPA – Forcimi i Policimit në Komunitet në Shqipëri, i financuar nga Qeveria Suedeze përmes SIDA dhe zbatuar nga Shoqata “Tjetër Vizion”.
Në përfundim, Bashkia Elbasan rikonfirmoi angazhimin për të forcuar komitetet lokale të sigurisë në çdo lagje, integrimin e perceptimeve të qytetarëve në politikat lokale, bashkëpunimin me shkollat, të rinjtë dhe komunitetet vulnerabël, si dhe për të siguruar komunikim të hapur dhe transparent mbi masat dhe rezultatet e arritura.
Ky takim përbën një hap të rëndësishëm drejt ndërtimit të një komuniteti më të sigurt dhe gjithëpërfshirës për qytetarët e Elbasanit.